Í dag fór fram undirritun grenndarsamnings sem er samningur sem Dalskóli og Reykjavíkurborg hafa gert með sér. Hildur Jóhannesdóttir skólastjóri Dalskóla og Þórólfur Jónsson Garðyrkjustjóri Reykjavíkurborgar undirrituðu samninginn. Auk Þórólfs kom Helena Óladóttir frá Náttúruskóla Reykjavíkur. Kennarar og börn úr Dalskóla sameinuðust á svæðinu og sungu nokkur lög.

Grenndarsamningur felur í sér að skóli tekur að sér ákveðið svæði í fóstur og sér um að hlúa að því og jafnvel rækta upp. Ekki er gert ráð fyrir því að manngerðar byggingar eða leiktæki rísi á svæðinu. Hugmyndin er frekar sú að ná upp skjóli með gróðursetningu trjáa og skjólbelta og gera góða aðstöðu fyrir útiveru.

Svæðið sem Dalskóli hefur tekið að sér er beint fyrir neðan skólann og er það stutt að fara fyrir litla fætur og var það sjónarmið helst til viðmiðunar þegar staðsetning var ákveðin.

Ætlunin er að nýta svæðið til útináms á ýmsan hátt en í vetur hefur útinám verið hluti af námi allra barna í Dalskóla.